Tujh Se Yun Rabta Bahaal Raha

Lamha Lamha Tera Khayaal Raha

Haath Jab Bhi Uthaey Dua kay Liay

Meray HontoN pe ek Sawaal raha

Jo Bhi Manga Teray Liay Manga

Apnay Daman Ka Nah Kuch Khayal Raha

Dil Prindah Tha Kesay urr Paata

Teri Yadon ka uss pe Jaal raha

Tum Milay Zindagi Main Jan Aai

Dukh Raha Nah Koi Malaal Raha

Teri Yadien jo chHoo Gai Mujh Ko

Phir to Her Lamha Kush Khayaal Raha

Door Reh Ker Bhi Pass Rehtay Ho

Apnay Rishtay Ka Yeh Kamaal Raha

Dard Se Mera Daman Bhar Day, Yaa Allah!

Phir Chahay Deewana Ker Day, Yaa Allah!

Main Ne Tujh Se Chaand Sitaray Kab Maangay

Roshan Dil Bay Daagh Nazar Day, Yaa Allah!

Sooraj Si ekk Cheez To Hum Sab Dekh Chukay

Sach Much Ki Ab Koi Sahar Day, Yaa Allah!

Yaa Dharti Kay ZakhmoN Per Marhum Rakh Day

Yaa Mera Dil Pathar Ker Day, Yaa Allah!

Dard Se Mera Daman Bhar Day, Yaa Allah!!!

Phir Chahay Deewana Ker Day, Yaa Allah!!!

Dil Main Ab Dard-e-Mohabbat Kay Siwa Kuch Bhi NahiN

Zindagi Meri Ibadat Kay Siwa Kuch Bhi NahiN

Main Teri Baar'Gah-e-Naaz Main Kia Pesh KeruN

Meri Jholi Main Mohabbat Kay Siwa Kuch Bhi NahiN

Ay Khuda! Mujh Se Nah Lay Meray GunahoN Ka Hisab

Meray Pass Ashk-e-Nadamat Kay Siwa Kuch Bhi NahiN

Woh To Mitt Ker Mujhay Mil He Gai Rahat Warna

Zindagi Ranj-o-Museebat Kay Siwa Kuch Bhi NahiN