Yaar bhi rait ki diwaar samajhtay hain mujhe

Main samajhta tha meray Yaar samajhtay hain mujhe

Main to youN chup hoon keh andar se bohot khali hoon

Aor sab log pur-asraar samajhtay hain mujhe

Main badaltay huay halaat main dhal jata hoon

Dekhnay walay ada-kaar samajhtay hain mujhe

Who jo uss paar hain, un kay liay iss paar hoon main

Woh jo iss paar hain, uss paar samajhtay hain mujhe

Naik logon main mujhe Naik gina jata hai

Aor gunehgaar, gunehgaar samajhtay hain mujhe